“Yangi O‘zbekistonning yangi pedagoglari” I talaba xotin-qizlar Forumi bo‘lib o‘tdi
Mamlakatimizda qizlar tarbiyasi, ularni mustaqil hayotga tayyorlash, zamonaviy bilim va hunarlarni egallashi, ish joyiga ega bo‘lishi, jamiyatda munosib o‘rnini topishiga alohida ahamiyat berilmoqda. Kuni kecha Chirchiq davlat pedagogika universitetida “Yangi O‘zbekistonning yangi pedagoglari” I talaba xotin-qizlar Forumi bo‘lib o‘tdi.
Prezidentimiz Shavkat Mirziyoevning 2020-yil 30-iyundagi “O‘zbekiston Respublikasida yoshlarga oid davlat siyosatini tubdan isloh qilish va yangi bosqichga olib chiqish chora-tadbirlari to‘g‘risida”gi farmoni hamda 5 ta muhim tashabbus ijrosi doirasida tashkil etilgan Forumda talaba xotin-qizlar, ijodkorlar, keng jamoatchilik ishtirok etdi.
Ayni kunlarda universitetda 15118 nafar xotin-qizlar ta’lim olmoqda. Universitetning o‘z oldiga qo‘ygan asosiy vazifalaridan biri mana shu talaba xotin-qizlarni qo‘llab-quvvatlash, ularning huquqiy savodxonligini yanada oshirish, jamiyat hayotida faol ishtirokini rag‘batlantirish, ularning sog‘lom turmush tarz kechirishi uchun qulay shart-sharoit yaratish, kreativ g‘oyalar yaratish yo‘lidagi sa’y-harakatini birlashtirish, respublikada qabul qilingan qonun hujjatlarini amalda ro‘yobga chiqarish bo‘yicha targ‘ibot ishlarini olib borishdir. Forum shu vazifalarni amalga oshirish mexanizmlarini aniqlashga ko‘mak berdi.
“Yangi O‘zbekistonning yangi pedagoglari” I talaba xotin-qizlar Forumida startap loyihalar va qizlar kasb-hunar markazlari taqdimotlari, tasviriy san’at ko‘rgazmalari, xorijlik mutaxassilar ishtirokida Germaniyadagi yetakchi univesiteti stipendiyalar dasturi bo‘yicha brifinglar, Talabalar akademiyasining faol talaba-qizlaridan mahorat darslari, talaba-qizlar sport sektsiyalarining namoyishi kabi loyihalar o‘tkazildi. Bosh prokuror o‘rinbosari Svetlana Ortiqova bilan talaba xotin-qizlarning davra suhbati tashkil etildi.
Forumga universitet rektori G‘ofurjon Muxamedov bilan talaba xotin-qizlarning muloqoti yakun yasadi. Universitet rahbari bilan bo‘lib o‘tgan muloqotda erishilgan yutuqlar bilan bir qatorda bugungi kunda talaba-qizlarning ijtimoiy-siyosiy faolligini oshirish borasidagi mavjud masalalar yuzasidan fikrlar almashildi. Muloqot davomida qo‘shma ta’lim dasturlari va Chirchiq davlat pedagogika universiteti ko‘magida xorijda tahsil olayotgan talaba-qizlar ham ishtirok etdi.
