Avval xabar berganimizdek, bugun Chirchiq davlat pedagogika universiteti “Inson farovonligini o‘rganishda fanlararo yondashuv” mavzusidagi xalqaro ilmiy anjuman o‘z ishini boshladi.  Xalqaro anjumanning dastlabki kuni ilmiy muloqotlar va yangiliklarga boy o‘tdi.  

     Chirchiq davlat pedagogika universiteti rektori G‘ofurjon Muxamedov ushbu nufuzli anjuman doirasida universitetga tashrif buyurgan qator universitetlar, dunyoning yetakchi «Aql markazlari» hamda nufuzli akademiya vakillari bilan hamkorlik aloqalarini mustahkamlashga qaratilgan uchrashuv o‘tkazdi. 

     Uchrashuv avvalida xorijlik mehmonlar G‘ofurjon Muxamedovga samimiy qabul va mehmondo‘stlik uchun minnatdorlik bildirib, xalqaro anjuman universitetlar o‘rtasidagi hamkorlik munosabatlarining natijasi sifatida e’tirof etildi. 

     Ural Federal universiteti (Ekaterinburg, Rossiya) xalqaro aloqalar bo‘yicha prorektori Sergey Tushin talabalarning ilmiy faolligi haqida o‘z mulohazalarini bildirdi. ChDPU Rektori G‘ofurjon Muxamedov  universitetlararo yozgi lagerlar, ilmiy, ma’rifiy, musiqiy va sport festivallarni tashkil etish masalasiga urg‘u berdi. 

     Rossiya ta’lim akademiyasining Ural mintaqaviy ilmiy markazi rahbari Elvira Symanyuk xalqaro anjumanga xush kayfiyat ulashgan Musiqa ta’limi yo‘nalishi talabalarining milliy ohanglari "Ilmiy tetiklik" ulashganligini bildirdi va ularni Rossiyaga taklif qildi.