Chirchiq davlat pedagogika universitetida 21-oktabr – “O‘zbek tili bayrami” kuni munosabati bilan “Jahon minbarida yangragan tilim” shiori ostida adabiy-ma’rifiy bayram tadbiri o‘tkazildi.  Tadbir Chirchiq shahar hokimiyati va tegishli mutasaddi tashkilotlar bilan hamkorlikda tashkil etildi. 

     Adabiy-ma’rifiy bayram buyuk alloma, o‘zbek adabiy tili asoschisi Alisher Navoiy haykali poyiga gulchambar qo‘yish bilan boshlandi. “Kimyogarlar” madaniyat saroyida bo‘lib o‘tgan tadbirda professor-o‘qituvchilar, adabiyotshunos va tilshunos olimlar, ijodkorlar hamda talaba-yoshlar ishtirok etdi. Davlat madhiyasi bilan boshlangan tadbirni Chirchiq shahar hokimi Davron Hidoyatov va Chirchiq davlat pedagogika universiteti rektori, professor G‘ofurjon Muxamedovlar o‘zlarining sana munosabati bilan tadbir ishtirokchilariga yo‘llagan bayram tabrigi bilan ochib berdilar.  

      Shahar hokimi o‘z nutqida Ona tilimiz nufuzi va mavqeyi yildan-yilga oshib borayotgani, uning yanada taraqqiy etishi, xalqaro maydonlarda baralla yangrashi uchun yurtimizda olib borilayotgan amaliy ishlarga to‘xtalib o‘tdi. Millat ko‘zgusiga bo‘lgan chuqur ehtirom har bir yoshning kundalik turmush tarzida ham namoyon bo‘lishi zarurligini ta’kidlab, barchani “O‘zbek tili bayrami” bilan tabrikladi. 

      — O‘z tilini hurmat qilgan ma’rifatli inson o‘zga xalqlarning ona tiliga ham chuqur hurmat bilan qaraydi,  — deydi universitet rektori G‘ofurjon Muxamedov.  — Buni mamlakatimizda ta’lim jarayonlari yetti tilda tashkil etilayotgani misolida ko‘rishimiz mumkin.  Yurtimizda istiqomat qilayotgan barcha millat va elatlarning tillari,  madaniyatlarining hurmat qilinishi uchun barcha sharoit yaratilgan.  Birgina Chirchiq davlat pedagogika universitetida ta’lim to‘rt tilda olib boriladi. 

     Shundan so‘ng universitet professor-o‘qituvchilari va talabalari tomonidan tayyorlangan ko‘y-qo‘shiq va badiiy, teatrlashtirilgan sahna ko‘rinishlari, Dutorchi qizlar guruhining musiqiy chiqishlari namoyish etildi.   

     Universitet va uning fakultetlarida bayram munosabati bilan rejalashtirilgan ma’naviy-ma’rifiy tadbirlar davom etmoqda.