Pedagogika fakulteti tyutorlarining tashabbusi bilan “Tarbiya klasterida – individual yondashuv” nomli individual tarbiyaga asoslangan ko‘rgazmali targ‘ibot tadbiri o‘tkazildi.
Bugungi kunda oliy o‘quv yurtlarida talabalarning mustaqil ta’lim olishini rivojlantirishga ko‘maklashuvchi murabbiylar ish olib bormoqda. Biroq endi ular guruh murabbiyi emas, balki tyutor maqomida. Tabiiyki, ularning vazifasi ham avvalgilardan tubdan farq qiladi.
Tyutorlik Chirchiq davlat pedagogika universitetida tarbiya jarayonini tizimli va samarali amalga oshirish muhim shakli va vositasi sifatida qaraldi. Tyutor talabalarning shaxsiy rivojlanishiga, ularning bo‘sh vaqtini mazmunli o‘tkazishga ko‘maklashuvchi pedagog bo‘lib, u yigit-qizlarni kasbga yo‘naltirish, turli lmiy to‘garaklarga jalb etish hamda muammo va kamchiliklarini o‘rganib, ularga atroflicha yechim topish bilan shug‘ullanadi.
O‘tkazilgan ko‘rgazmali tadbirda Pedagogika fakulteti tyutorlarining faoliyati misolida shu jihatlarga e’tibor qaratildi. Talabalarning erishgan yutuqlari va g‘oliblik imkoniyatlari , egallagan hunar va bilimlari orqali fakultet tyutorlik faoliyatiga baho berildi.
Talabalarni to‘g‘ri yo‘naltirganligi, tizimli ishlash natijalari va samaradorligi tahlil qilindi. Tashkil etilgan ko‘rgazmali amaliy seminarda tyutorlar individual yondashuv asosida olib borayotgan to‘garak natijalari turli amaliy metodlar orqali namoyish etildi.
Pedagogika fakulteti tyutorlari tashabbusi bilan tashkil etilgan “Yosh kitobxon talaba”, “Zakovat bilimdonlari”, “Men chizgan rasm”, “Sport va tarbiya yetakchilari”, “Pazanda qizlar” to‘garaklari, “Qizlarjon” va "Yosh sartaroshlar" klublari faollarining ko‘rgazmali chiqishlari talabalarda qiziqish uyg‘otdi.
"Tyutorlikka bilimli, dunyoqarashi keng, pedagogik va psixologik tajribaga ega munosib xodimlar tanlaganiga guvoh bo‘ldik. O‘ylaymanki, yangi tashkil etilgan tizim vakillari oldiga qo‘ygan vazifani uddalayapti. Eng asosiysi, ular talaba-yoshlarning yaqin ko‘makchisi, ta’lim jarayonida xolis yo‘l ko‘rsatuvchisiga aylanmoqda", — dedi universitet rektori G‘ofurjon Muxamedov.
