Ayni kunda Chirchiq davlat pedagogika universitetidagi mavjud 10 ta fakultet vа qo'shma ta'limda 32 ta ixtisoslik bo‘yicha kunduzgi ta’lim yo‘nalishida 9555 nafar talaba tahsil oladi. Ulardan 2165 nafari bitiruvchi talaba hisoblanadi.
Chirchiq davlat pedagogika universiteti rektori, O‘zbekiston Respublikasi fan arbobi, professor G‘ofurjon Muxamedov ishtirokida “Rektor va talabalar uchrashuvi” bo‘lib o‘tdi. Uchrashuvda rektor talabalar bilan uchrashib, ochiq suhbat olib bordi.
Uchrashuvda rektor keyingi yillarda mamlakatimizda oliy ta’lim tizimini isloh qilish, o‘qitishni xalqaro talablar darajasiga olib chiqish, malakali mutaxassislar tayyorlash, talaba yoshlarning o‘qib, puxta bilim olishi, o‘z iqtidor va salohiyatlarini yuzaga chiqarishlari uchun barcha sharoitlar yaratib berilayotganligini ta’kidladi. Ayniqsa, talabalarning muammolarini hal etish, taklif va tashabbuslarini qo‘llab-quvvatlashga alohida e’tibor qaratilayotganligi qayd etildi.
- Hayot kurashdan iborat. Bu kurashda faqat kuchli bilim va salohiyatga ega bo‘lganlargina g‘olib bo‘ladi, - deydi universitet rektori, - Sizning ertangi kelajagingizni ilm-ma’rifat nuri yoritadi. Bugungi zamonda yaxshi yashash degan masala, eng avvalo, moddiyatga borib taqaladi. Bu ayni haqiqat. Jamiyatning intellektual salohiyati qanchalik boy bo‘lsa, u iqtisodiy jihatdan ham boy bo‘ladi. Universitet siz, yoshlarga yo‘l ko‘rsatuvchi yo‘lboshchi xolos. Siz hayotdagi o‘rningizni o‘z bilimingiz va mehnatingiz evaziga topasiz. Kelgusi hayotingiz sifati sizning bilimingiz bilan yuqori bo‘ladi.
- Birinchi kurs talabasiman. Qisqa muddatda universitet strategiyasi va talabalar bilan bog‘liq loyihalar bilan tanishishga ulgurdim, - deydi Pedagogika fakulteti talabasi Odina Begimqulova. - Uchrashuvda universitetdagi imkoniyatlar, ayniqsa chet tilini o‘rganishning bugungi kundagi ahamiyati bo‘yicha yetarlicha ko‘nikmaga ega bo‘ldim. Aniqroq qilib aytsam, tadbirdan katta ruhiy qo‘llab-quvvatlash oldim. Ustoz hayotiy tajriba misollarini keltirganda ko‘z oldimda o‘zimning rejalarimni tuzdim. Yana bir karra Chirchiq davlat pedagogika universitetini tanlab, to‘g‘ri qaror qabul qilganimga amin bo‘ldim.
- Rektor va talabalar uchrashuvi ko‘tarinki ruhda o‘tdi. Bu tadbirni kutmagan edim, - deydi Matematika va informatika fakulteti talabasi Hasan Ne’matov. - Yakuniy imtihon topshirish jarayonidaman. Imtihonlarni har kim turlicha talqin qiladi. Uchrashuvda bunga oid savollarga aniqlik kiritildi. Bugungi tadbirda o‘quv jarayonlari bo‘yicha to‘liq ma’lumotga ega bo‘ldim. Imtihonlar adolatli va shaffof o‘tishiga ishonchim komil. Shuningdek, rektorning talabalar muammolari va kamchiliklarini eshitib, mas’ullarga kerakli topshiriq bergani hamda yoshlarga to‘g‘ri yo‘nalish ko‘rsatgani tahsinga sazovordir…
Uchrashuv davomida talabalar universitet strategiya va istiqbolli rejalari, o‘quv jarayonlari, xalqaro talabalar almashinuvi va yakuniy nazorat tizimi haqida o‘zlarini qiziqtirgan savollarga javob oldilar.
