Chirchiq davlat pedagogika universiteti Fizika va kimyo fakulteti Fizika kafedrasi tomonidan “Raqobatbardosh kadrlarni tayyorlashda individual ta’lim imkoniyatlari” mavzusida amaliy-metodik tadbir o‘tkazildi. Tadbirning asosiy maqsadi zamonaviy xalqaro professional standartlarga javob beradigan raqobatbardosh kadrlarni tayyorlash jarayonida individual ta’limning imkoniyatlarini namoyish etishdan iborat bo‘ldi.
Tadbir davomida talaba va professor-o‘qituvchilar tomonidan tayyorlangan bir qator qiziqarli amaliy ishlar va loyihalar taqdim etildi. Jumladan, shamol generatorlari, mini GES ishlash prinsipi, kungaboqar texnologiyasi, raketa modellari, onlayn teleskop yordamida astronomiya kuzatuvlari hamda “aqlli uy” maketlari namoyish qilindi.
Shuningdek, tadbirda fizika fanini o‘qitish metodikasi, fizik eksperimentlarni tashkil etishdagi didaktik talablar, raqamli texnologiyalardan foydalanish imkoniyatlari va o‘yin elementlariga asoslangan ta’lim metodlari haqida batafsil ma’lumot berildi. Talabalarning amaliyotlari uchun mo‘ljallangan 4+2 dasturi doirasida bajarilgan ishlar va talabalar tomonidan tayyorlangan namoyishli darslar (DEMO LESSONS) alohida qiziqish uyg‘otdi.
Xususan, 4+2 dasturi doirasida talabalarning zamonaviy laboratoriya mashg‘ulotlarini tashkil etish bo‘yicha ishlari, eksperimentlarning didaktik asosda dars mavzulariga mos tarzda o‘tkazilishi, raqamli texnologiyalar (simulyatorlar, interaktiv vositalar), geymifikatsion metodlar va STEAM konsepsiyasiga asoslangan astronomik kuzatuvlar yoritildi. Mentimeter platformasida tashkil etilgan viktorinalar, Stellarium dasturidan foydalanilgan kuzatuvlar va integratsiyalashgan ta’lim loyihalari talabalar faolligini oshirdi.
Tadbir yakunida universitet rektori, kimyo fanlari doktori, professor Muxamedov Gafurjon Israilovich tomonidan so‘zga chiqib, tadbirning muhimligini ta’kidlab o‘tdi va barcha ishtirokchilarga minnatdorlik bildirdi.
Umuman olganda, tadbir talabalarning amaliy bilim va ko‘nikmalarini rivojlantirish, nazariy bilimlarni amaliyot bilan uyg‘unlashtirish hamda innovatsion g‘oyalar va loyihalarni qo‘llab-quvvatlashda muhim ahamiyat kasb etdi.
