Chirchiq davlat pedagogika universitetida 50 nafar xalqaro ekspertlar hamda 250 dan ortiq mahalliy olimlar va talabalar ishtirokida “Raqamlashgan jamiyatda inson kapitalini rivojlantirish: imkoniyat va istiqbollari” mavzusida xalqaro ilmiy-amaliy konferensiya bo‘lib o‘tdi.
Ushbu anjumanda ilgari surilgan masalalar “Ilm-fanni 2030-yilgacha rivojlantirish konsepsiyasini tasdiqlash to‘g‘risida”gi PF-6097-son Farmonida belgilangan vazifalardan kelib chiqib, shuningdek “O‘zbekistonning yangi taraqqiyot davrida ta’lim-tarbiya va ilm-fan sohalarini rivojlantirish chora-tadbirlari to‘g‘risida”gi PF-6108-son, “2022-2026 yillarga mo‘ljallangan yangi Taraqqiyot strategiyasi to‘g‘risida”gi PF-60-son hamda “O‘zbekiston - 2030” strategiyasi to‘g‘risi”dagi PF-158-son Farmonlarida ko‘rsatilgan respublikamizdagi ijtimoiy, iqtisodiy, siyosiy, ma’naviy sohadagi inson kapitalini rivojlantirishga qaratilgan hamda O‘zbekiston Respublikasida oliy ta’limni tizimli isloh qilishning ustuvor yo‘nalishlarini belgilash, zamonaviy bilim va yuksak ma’naviy-axloqiy fazilatlarga ega, mustaqil fikrlaydigan yuqori malakali kadrlar tayyorlash jarayonini sifat jihatidan yangi bosqichga ko‘tarish, oliy ta’limni modernizatsiya qilish, ilg‘or ta’lim texnologiyalariga asoslangan holda ijtimoiy sohani rivojlantirish maqsadida tashkil etildi.
Shuningdek, konferensiya inson kapitalining jamiyat ijtimoiy-iqtisodiy taraqqiyotidagi o‘rni, uni shakllantirish va rivojlantirish omillari, inson kapitalini rivojlantirish borasidagi imkoniyatlar, bu boradi vujudga kelayotgan yangi tendensiyalariga bag‘ishlandi. Ayniqsa, jahonda va respublikamizda bugungi raqamlashgan olamda inson kapitalini rivojlantirish imkoniyatlari hamda muammolari bo‘yicha o‘zaro fikr almashildi.
Anjumanda rivojlangan davlatlar hamda respublikamizdagi ijtimoiy, iqtisodiy, siyosiy, ma’naviy sohadagi barcha mutaxassislarning inson kapitalini rivojlantirishga qaratilgan qarashlari, g‘oyalari, konsepsiyalarining ilmiy asoslarini muhokama qilish natijasida bu sohadagi muammolarga yechim topishga imkonini beradigan ilmiy xulosa va tavsiyalar tayyorlandi.
Ushbu anjumanda raqamlashtirish sharoitida oliy ta’lim transformatsiyasining ustuvor yo‘nalishlari; tarix va tarixiy qadriyatlar targ‘ibi: raqamlashtirish kontekstida; Uchinchi renessans va inson kapitali: o‘zaro aloqadorlik dialektikasi; ijtimoiy gumanitar fanlarning dolzarb muammolari hamda fan, ta’lim va ishlab chiqarish integratsiyasida iqtidorli yoshlar ishtiroki: milliy va xalqaro tajriba kabi sho’balarda ma’ruza qilindi.
Anjumanda Chirchiq davlat pedagogika universiteti bilan birga O‘zFA Davlat va huquq instituti; O‘zFA Tarix instituti; Nizomiy nomidagi Toshkent davlat pedagogika universiteti; Farg‘ona davlat universitetlari bilan birga Al-Farobiy nomidagi Qozog‘iston Milliy universiteti, B.Sidiqov nomidagi Qirg‘iziston-O‘zbek xalqaro universiteti, X.Dustmaxamedov nomidagi Atirav universitetlari hamkor tashkilotlar sifatida tashkil etildi.
Anjumanda 10 dan ortiq xorijiy davlatlardan mutaxassis olimlar oflayn va onlayn zum platformasi orqali ishtirok etdi. Jumladan, Qozog‘iston, Qirg‘iziston, Rossiya, Belorussiya, Mongoliya, Italiya, Turkiya kabi xorijiy davlatlardan mehmonlar anjumanda o‘z ma’ruzalari bilan qatnashdi.
Xalqaro anjuman yakunida ishtirokchilari tomonidan ta’lim tizimida inson kapitalini rivojlantirishga qaratilgan rezolyutsiya qabul qilindi.
