Ingliz tili nazariyasi va amaliyoti kafedrasi mudiri Diana Abduramanova hamda kafedra professor-o‘qituvchilari Toshkent viloyati, Parkent tumanida joylashgan Quruqsoy, Qo‘shshukur hamda Istiqlol mahalla fuqarolar yig‘inida joylashgan 40-, 50-, 10-sonli umumta’lim maktablariga tashrif buyurdilar.

     Tashrifning asosiy maqsadi ushbu maktablar bilan kelgusida ilmiy va amaliy hamkorlik munosabatlarini yo‘lga qo‘yish, seminar-treninglar tashkil etish hamda ta’lim muassasalariga metodik ko‘mak berishdan iborat edi. Ushbu maqsadni amalga oshirish doirasida tomonlar o‘rtasida rasmiy hamkorlik shartnomalari imzolandi.

     Tashrif davomida maktab rahbariyati va ingliz tili fani o‘qituvchilari bilan uchrashuv tashkil qilindi. Suhbat jarayonida ta’lim jarayonini takomillashtirish bo‘yicha taklif va muammolar tinglanib, dars mashg‘ulotlari kuzatildi va tahlil qilindi. Maktablarning ilmiy salohiyatini oshirishga ko‘maklashish maqsadida kafedra professor-o‘qituvchilari tomonidan tayyorlangan darslik va o‘quv qo‘llanmalar, shuningdek, badiiy adabiyotlar to‘plami maktab kutubxonalariga taqdim etildi.

     Mazkur tashrif maktablar bilan uzoq muddatli hamkorlik o‘rnatish va o‘quv jarayonini ilmiy-metodik jihatdan rivojlantirishga xizmat qilishi kutilmoqda.