Chirchiq davlat pedagogika universiteti tomonidan oliy ta’lim sohasidagi zamonaviy tendensiyalar, xalqaro tajribalar va innovatsion yondashuvlarni tahlil qilish, ularni milliy va xalqaro ta’lim tizimiga moslashtirish yo‘llarini muhokama qilish maqsadida “Ko‘p tarmoqli tadqiqot va ta’limning global istiqbollari” mavzusida xalqaro ilmiy-amaliy konferensiya  tashkil etildi. 

     Xalqaro konferensiya qamrovi va geografiyasi ham ancha keng bo‘ldi. Xususan, xalqaro konferensiya ishida mamlakatimizdagi oliy ta’lim muassasalari vakillari bilan birgalikda, Turkiya, Indoneziya, Rossiya, Tojikiston, Qozog‘iston, Ozarbayjon, Belarus, Ukraina davlatlaridagi nufuzli yetakchi oliy ta’lim muassasalari rektorlari,  professor-o‘qituvchilari, taniqli olimlar, xalqaro ekspertlar, ilmiy-tadqiqot tashkilotlarning mutaxassislari ishtirok etdi. 

     Jumladan, Turkiyaning Iksad, Adan Alpasan texnologiya universiteti, Indoneziyaning Pendidikan, Nigeri Malang, Qozog’istonning Yevroosiyo milliy universiteti, Rossiya ta’lim akademiyasi, Ozarbayjon biznes va menejment universiteti, Т kabi ilg‘or oliygohlaridan taniqli professorlar qatnashib, samarali muloqot olib bordi. 

     Xalqaro konferensiyasi doirasida mamlakatimiz va xorijdagi taniqli olimlar ishtirokida ilmiy ma’ruzalar taqdim etildi. Ushbu ma’ruzalarda oliy ta’lim tizimini takomillashtirish, innovatsion yondashuvlar joriy etish va xorijiy tajribalarni o‘rganish masalalari muhokama qilindi. Chuningdek, tadbir doirasida ta’lim sohasidagi xalqaro hamkorlikni kuchaytirish, zamonaviy pedagogik texnologiyalar va transformatsiya jarayonlarini amaliyotga tatbiq etish bo‘yicha tajriba almashildi va istiqbolli loyihalar muhokama qilindi. 

     Turkiyadan tashrif buyurgan Adan Alpasan texnologiya universiteti rektori,  professor Adan So‘zen Xalqaro konferensiya to‘g‘risida iliq fikrlarni bildirdi: 

     “Ushbu xalqaro konferensiya meni juda xursand qildi.  Unda turli mamlakatlardan ko‘plab mutaxassislar ishtirok etib, o‘z tajribalarini o‘rtoqlashdi. Qiziqarli munozaralar tashkil etildi. O‘ylaymanki, bu kelgusida ta’lim tizimimizni yanada rivojlantirish uchun xizmat qiladi”. 

     Konferensiya oliy ta’limni transformatsiya qilish va xalqaro tajribani joriy etish bo‘yicha muhim muloqot maydoni bo‘lib xizmat qildi.  Konferensiya yakunida xalqaro ta’lim va tadqiqot muassasalari o‘rtasida hamkorlikni kengaytirish, qo‘shma ilmiy tadqiqotlar hamda loyihalarni amalga oshirish bo‘yicha kelishuvga erishildi. 

     Shuningdek, ta’limda raqamlashtirish va sun’iy intellekt imkoniyatlarini kengaytirish, xalqaro ta’lim standartlari va baholash tizimlarini integratsiyalash, yetakchi xorijiy universitetlarning ilg‘or tajribasini Chirchiq davlat pedagogika universitetiga tatbiq etish bo‘yicha aniq takliflar ishlab chiqildi.