Gumanitar fanlar fakulteti va Tasviriy san’at kafedrasi hamkorligida Tasviriy san’at va muhandislik grafikasi ta’lim yo‘nalishi bitiruvchisi Charos Qo‘nishovaning bitiruv malakaviy ishi himoyasi o‘tkazildi. Bitiruv malakaviy ish himoyasida universitet rektori G‘ofurjon Muxamedov ham ishtirok etdi.
Himoya avvalida Gumanitar fanlar fakulteti bog‘ida bitiruvchi va ijodkor Charos Qo‘nishovaning “Orzular parvozi” afsonaviy qanotli ot haykalining ochilishi bo‘lib o‘tdi.
“Qanotli afsonaviy ot azaldan xushyorlik, aql-idrok, tezlik va ezgulik timsoli sifatida ulug‘lanib kelgan. “Tasviriy san’at va dizayn” kafedrasi yosh bitiruvchisi Charos qizim tomonidan yaratilgan mazkur haykal-stellani chin ma’noda talabalarning kelajak sari ijodiy parvozga shaylanayotganligining ramziy ifodasi sifatida qad rostladi. Ishonchimiz komilki, mazkur obraz chin ma’noda bo‘lajak ijodkorlar qalbiga go‘zallik, nafosat, bunyodkorlik va vatanimizga, Universitetimizga muhabbat tuyg‘ularini olib kiraveradi, talabalarimiz ham mo‘’jizalar yarataveradi”, - dedi universitet rektori, professor G‘ofurjon Muxamedov haykal ochilishidagi nutqida.
Tanatanali marosimdan so‘ng bitiruvchi Charos Qo‘nishovaning “Maktab o‘quvchilarining badiiy ijodiy qobiliyatlarini rivojlantirishda tasviriy san’atning ahamiyati (erkin mavzuda kompozitsiya ishlash) mavzusidagi bitiruv ishi muhokamasi bo‘lib o‘tdi.
“Ma’lumki, Yurtimiz tasviriy san’atida qanotli ot tasvirining rivojlanish evolyutsiyasini o‘ziga xos tarixga ega. Ijodkor qizimiz Charosning ushbu haykalni yaratish jarayonida ham o‘z maslahatlarim bilan qatnashdim. Katta ijodiy mahoratga ega bo‘lgan talabalarni katta hayot yo‘liga kuzatayotgan universitet jamoasiga rahmatlar aytaman”, – dedi bitiruv malakaviy ishi himoyasini o‘tkazish komissiyasi raisi, Badiiy akademiya a’zosi Ruslan Xalilov.
Himoyada ishtirok etgan professor-o‘qituvchilar bitiruvchi talabalarga doim dadil harakatda bo‘lishlarini, universitetning faxriga aylanib yurishlarini tiladilar.
Tadbirda ishtirok etgan Chirchiq shahri o‘rta maktab bitiruvchi o‘quvchilari Charos Qo‘nishova kabi talaba bo‘lish istagini bildirishdi.
