Boshlang‘ich ta'lim nazariyasi va amaliyoti kafedrasi professor-o‘qituvchilari SMA (Spinal mushak atrofiyasi) kasalligiga chalingan E’zozaxon Elyorova holidan xabar oldi.

     Qizaloqning onasi farzandining madaniy-ma’rifiy hayotini yuksaltirishga ko‘mak berish istagida kelgan universitet vakillariga minnatdorchilik bildirdi. 

     – Farzandimning sog‘ayib, tengdoshlari kabi idrokli qiz bo‘lishi uchun ko‘maklashgan insonlardan bir umr minnatdormiz, – deydi E’zozaning onasi Nodira opa. – Qizimning sog‘ayib ketishi uchun uzoq davolanishiga to‘g‘ri keldi. Farzandimning maktab ko‘nikmalarini shakllantirish yo‘lidagi harakatlaringizni qo‘llab-quvvatlayman.

     Boshlang‘ich ta'lim nazariyasi va amaliyoti kafedrasi professor-o‘qituvchilari E’zozani dastlabki pedagogik diagnostikadan o‘tkazdilar. Oila rahbarlari bilan E’zozaning his-tuyg‘ulari, aqliy jarayonlari haqida fikr almashdilar. E’zoza bilan tizimli ishlash masalasi yuzasidan o‘z mulohazalarini bildirdilar.

     E’zoza universitet o‘qituvchilarini bayram munosabati bilan mehr ishoralari ila tabrikladi.