O‘zbekiston Yozuvchilar uyushmasida “Shuhrat” medali sohibi, filologiya fanlari nomzodi Gulandom Tog‘ayevaning “Ishq handasasi” nomli kitobi taqdimoti bo‘lib o‘tdi.  

     Gulandom Tog‘ayeva she’riyati zo‘r iztirobi, samimiyatga  yo‘g‘rilgani, darveshona ruhi bilan muxlislar e’tiborini qozongan. Shoiraning "Ishq handasasi" she’riy to‘plamidan uning turli yillarda yozilgan eng sara she’rlari o‘rin olgan. Uning she’rlarida beg‘uborlik, jo‘shqinlik, teran mung, ishq, o‘zbek qizining ibo-hayosi, andishasi, bir so‘z bilan aytganda, nozik qalb jozibasi bor bo‘yi bilan namoyon bo‘ladi. Beg‘ubor tuyg‘ular jilosi, betakror ohang harorati adabiyot ixlosmandlarini befarq qoldirmaydi.    

     Taqdimotda O‘zbekiston Yozuvchilar uyushmasi raisi, O‘zbekiston Xalq shoiri Sirojiddin Sayyid Gulandom Tog‘ayevani kitob taqdimoti bilan qutlab, Chirchiq davlat pedagogika universiteti rahbariyatiga samimiy tilaklarini bildirdi.   

     Universitet nomidan Axborot siyosati masalalari bo‘yicha rektor maslahatchisi Dilshod Rahmatov va O‘zbek adabiyotshunosligi kafedrasi mudiri Nodira Xoliqovalar so‘zga chiqib,  "Ishq handasasi" she’riy to‘plami va universitet ijodkor yoshlariga berayotgan ko‘magi haqida fikr yuritdilar.

     Universitetning “Mushoira” klubi ishtirokchilari tomonidan  adabiy-badiiy kompozitsiya  namoyish etildi. 

     Yozuvchilar uyushmasi raisi Sirojiddin Sayyidga universitet rektori G‘ofurjon Muxamedovning minnatdorlik xati va maxsus esdalik sovg‘asi topshirildi

     Shoira  Gulandom Tog‘ayeva yig‘ilganlarga yangi kitobini tuhfa qildi.