2025-yil mart-aprel oylarida Chirchiq davlat pedagogika universiteti hamda Indoneziya pedagogika universiteti hamkorligida ChDPU talabalari uchun “Ilmiy tadqiqot metodologiyasi va maqola chop etish” bo‘yicha maxsus onlayn o‘quv kursi tashkil etildi. 15-martdan 9-aprelgacha davom etgan ushbu kurs doirasida 16 ta asosiy dars (12 tasi onlayn, 4 tasi oflayn shaklda) o‘tkazildi.

     O‘quv kursida ishtirokchilarga ilmiy tadqiqot metodologiyasiga kirish, tadqiqot etikasiga rioya qilish, ilmiy savollar va gipotezalar ishlab chiqish, adabiyotlar sharhi va manbalari bilan ishlash, tadqiqot dizayni, namunalar tanlash va ma’lumot to‘plash, sifat va miqdoriy tahlil, ilmiy hisobot tayyorlash hamda maqolalarni nashrga tayyorlash jarayonlari yuzasidan chuqur bilim va amaliy ko‘nikmalar berildi. Shuningdek, ishtirokchilarga “yirtqich” (predator) jurnallarni aniqlash va ulardan saqlanish bo‘yicha ham tavsiyalar berildi.

     Kurs yakunida talabalar uchun fan va ijtimoiy yo‘nalishlar bo‘yicha alohida sessiyalarda amaliy mashg‘ulotlar va individual konsultatsiyalar o‘tkazildi.

     Mazkur o‘quv kursi Chirchiq davlat pedagogika universiteti va Indoneziya pedagogika universiteti o‘rtasidagi xalqaro ilmiy hamkorlikni mustahkamlash, talabalar va yosh tadqiqotchilarning ilmiy salohiyatini oshirish hamda ularni nufuzli jurnallarda maqolalar chop etishga tayyorlash yo‘lida muhim qadam bo‘ldi.