Chirchiq davlat pedagogika universitetining qadrli talabalari, professor-o‘qituvchilari va xodimlari!
Barchangizni Mustaqilligimizning 33 yillik shodiyonasi hamda yangi o‘quv yilining boshlanishi bilan chin qalbdan tabriklayman!
Oldinda bizni cheksiz imkoniyatlar, yuksak marralar va yorqin g‘alabalar kutmoqda! Boshqacha bo‘lishi ham mumkin emas! Chunki biz bir-birimizni qo‘llab-quvvatlagan holda o‘z oldimizga maqsadlar qo‘yib, ularga erishishga intilamiz, o‘samiz, rivojlanamiz, tafakkurimizni kengaytiramiz, har kuni oldinga yangi qadam tashlaymiz!
Aziz birinchi kurs talabalari! Kelajagini aynan bizning universitetimiz bilan bog‘lashga qaror qilgan birinchi kurs talabalarini katta mamnuniyat bilan qutlayman. Bu yerda munosib ta’lim olishingiz uchun barcha sharoitlar hozirlangan. Albatta, ko‘p narsa Sizning mehnat va intilishingizga bog‘liq, biz esa hayotda to‘g‘ri yo‘lni topishingizga ko‘maklashadigan ishonchli yo‘lboshchi bo‘lib xizmat qilishga shaymiz.
Hurmatli ustozlar va murabbiylarimizga alohida murojaat qilmoqchiman. Ishingizga ko‘rsatayotgan sadoqatingiz uchun tashakkur! Talabalarni yangi bilim olishiga va o‘zini har tomonlama namoyon etishga ruhlantirish, ularga qobiliyatlarini anglash va kuchli tomonlarini ochishda yordam berish - bebaho ne’mat. Ushbu ayyomda Sizlarga kasbiy yuksalish, oila a’zolaringizga salomatlik va farovonlik tilayman!
Biz birgalikda katta maqsadlar bilan o‘quv yilini boshlamoqdamiz. Xalqaro darajadagi pedagog-kadrlarni tayyorlash masalasi har doimgiday bosh strategiyamiz bo‘lib qoladi. Ilg‘or xorijiy tajribalar asosida ishlab chiqilgan zamonaviy ta’lim dasturlari, ilm-fan va amaliyot yangiligi, innovatsion ta’lim amaliyoti yutuqlari hamda raqamlashtirish texnologiyalari uyg‘unlashgan ijtimoiy hamkorlikni kuchaytirish orqali universitetning xalqaro imidjini yaratishda talabalarimizning g‘oya va intilishlari asosiga quramiz.
Yangi o‘quv yili barcha uchun qiziqarli va mahsuldor yil bo‘lsin, yangi kashfiyotlar va yutuqlar quvonch olib kelsin! Sizlarga eng ezgu tilaklar, o‘qish va mehnat faoliyatingizda muvaffaqiyatlar tilayman!
Universitet rektor, professor
G‘ofurjon Muxamedov