Boshlang‘ich ta’lim jarayonida individual yondashuvni qo‘llash zamonaviy ta’lim tizimining takomillashtirilishi uchun muhim yo‘nalishlardan biridir. Bu, o‘z navbatida, shaxsning ijobiy fazilatlarini aniqlash, muntazam psixologik-pedagogik tashxislash, ta’lim-tarbiya jarayonida shaxs xususiyatlarini hisobga olish, shaxs rivojlanishini bashorat etish kabi ko‘plab jarayonlarni o‘z ichiga oladi.
Boshlang‘ich sinfda har bir fanni yaxshi o‘zlashtirgan o‘quvchi, kelajakda bilimlarni yanada yaxshi egallashi aniqdir. Bunga erishish uchun, o‘qituvchi har bir o‘quvchiga e’tibor berishi, individual yondashuv asosida ularning o‘ziga xos qobiliyatlarini ochib bera olish va darslarga qiziqtira olish zarur.
Shu boisdan, boshlang‘ich ta’lim yo‘nalishi talabalari 4+2 yoki pedagogik amaliyotlar davomida turli metodikalarni o‘z ob’ektlarida qo‘lladilar. Bu orqali ular boshlang‘ich sinf o‘quvchilarida ta’lim olayotgan fanlari bo‘yicha bir qator muammolarni aniqladilar. Shuningdek, o‘quvchilarning olingan bilimlarini hayot davomida qo‘llay olishlari va muammoli vaziyatlardan chiqish yo‘llarini bilmasliklari ham o‘rganildi.
Natijada, talabalar ustozlari yordamida ushbu muammolarga yechim topdilar va yangi metodikalar asosida dars berish tamoyillarini ishlab chiqdilar. Misol uchun, talabalar o‘quvchilarda "ko‘raman", "ushlayman", "his qilaman", "ta’savvur qilaman", "bajaraman" tamoyillari asosida bilim va ko‘nikmalarni shakllantirdilar. Ular o‘quvchilarga ko‘rib, his qilib, o‘zlari amalda bajarib ko‘rsatish orqali darslarni yanada ta’sirchan va samarali qildilar.
Bu metodning o‘quvchilarga ta’siri ham o‘zini ko‘rsatdi: ijodkorlikni oshirish, o‘zlashtirishni osonlashtirish, fazoviy tafakkurni rivojlantirish, STEM fanlariga qiziqishni kuchaytirish, tasavvur va ijodkorlikni rivojlantirishga yordam berdi. Shuningdek, bilim olish jarayonini yanada qiziqarli va samarali qilish imkoniyatini yaratdi.
Tadbirda universitet talabalari o‘zlari o‘rgangan metodikalarni namoyish etib, boshlang‘ich ta’limda individuallikka yo‘naltirilgan ta’lim tizimining samaradorligini isbotladilar.
